کوٹلی (کشمیر ایکسپریس نیوز) وزیر مال و بحالیات آزاد جموں و کشمیر راجہ محمد ریاست خان وزیر حکومت کا منصب سنبھالنے کے بعد پہلی مرتبہ اپنے آبائی حلقہ انتخاب پہنچے تو پورا حلقہ ان کے استقبال کے لیے امڈ آیا۔ بیور سے گل پور تک مختلف مقامات پر مسلم لیگ (ن) کے کارکنوں اور عوام نے اپنے منتخب نمائندے کا تاریخی اور فقیدالمثال استقبال کیا۔ بیور، ہولاڑ، پلائی گالہ، بھرنڈ، بڈلی چوک، سہرمنڈی اور گل پور چوک سمیت مختلف مقامات پر عوام کے بڑے اجتماعات نے راجہ محمد ریاست خان کا پرتپاک خیرمقدم کیا۔
راجہ محمد ریاست خان کی آمد پر کارکنوں اور عوام کا جوش و خروش دیدنی تھا۔ مختلف مقامات پر ان پر پھولوں کی پتیاں نچھاور کی گئیں، ڈھول کی تھاپ پر کارکنوں نے بھنگڑے ڈالے اور قائد کے حق میں پرجوش نعرے بلند کیے۔ کئی مقامات پر نوجوانوں اور کارکنوں نے راجہ محمد ریاست خان کو گھوڑے پر سوار کرکے استقبالی پنڈال تک پہنچایا۔ جگہ جگہ استقبال کے باعث ایسا محسوس ہوتا تھا جیسے پورا حلقہ اپنے منتخب نمائندے کی کامیابی کا جشن منا رہا ہو۔
وزیر مال و بحالیات راجہ محمد ریاست خان کے ہمراہ ممبر اسمبلی راجہ محمد آصف بھی موجود تھے۔ مختلف مقامات پر مسلم لیگ (ن) کے مقامی عہدیداران، کارکنان، عمائدین علاقہ اور عوام نے ان کا استقبال کیا۔ استقبالی پنڈال میں سابق وزیر سردار فاروق سکندر، کوآرڈینیٹر ٹو وزیر امور کشمیر سردار طارق، مسلم لیگ (ن) ضلع کوٹلی کے صدر ادریس حیات اور سابق امیدوار اسمبلی راجہ محمد افتخار سمیت دیگر سیاسی و سماجی شخصیات بھی موجود تھیں۔
استقبالی پنڈال میں مسلم لیگ (ن) کے ہزاروں کارکنوں اور عوام کے بڑے اجتماع سے خطاب کرتے ہوئے وزیر مال و بحالیات راجہ محمد ریاست خان نے کہا کہ آج اپنے لوگوں کے درمیان موجود ہو کر جس محبت، خلوص اور والہانہ عقیدت کا مظاہرہ دیکھ رہا ہوں، اسے زندگی بھر فراموش نہیں کرسکتا۔ انہوں نے کہا کہ حلقہ انتخاب کے عوام نے انہیں اعتماد دے کر اسمبلی میں پہنچایا اور آج انہیں وزیر حکومت کی ذمہ داری ملی ہے، وہ اس اعتماد اور محبت پر اپنے عوام کے تہہ دل سے شکر گزار ہیں۔
انہوں نے کہا کہ عوام کا اعتماد میرے لیے وزارت سے کہیں بڑھ کر ایک ذمہ داری ہے۔ میں اپنے حلقے کے عوام کی توقعات پر پورا اترنے اور ان کے مسائل کے حل کے لیے اپنی تمام تر صلاحیتیں بروئے کار لاؤں گا۔ انہوں نے کہا کہ وزارت کا منصب ان کے لیے اعزاز ضرور ہے تاہم اصل مقصد عوام کی خدمت، علاقے کی ترقی اور لوگوں کے مسائل کا ازالہ ہے۔
راجہ محمد ریاست خان نے کہا کہ حلقہ انتخاب کے عوام نے ہمیشہ ان کا ساتھ دیا اور مشکل وقت میں بھی ان کے ساتھ کھڑے رہے۔ آج عوام کی جانب سے ہونے والا یہ شاندار استقبال ان کی محبت اور اعتماد کا عملی اظہار ہے۔ انہوں نے کہا کہ وہ عوام کو یقین دلاتے ہیں کہ ان کے دروازے ہمیشہ عوام کے لیے کھلے رہیں گے اور وہ اپنے لوگوں سے رابطہ اور تعلق مزید مضبوط بنائیں گے۔
وزیر مال و بحالیات نے مسلم لیگ (ن) کے کارکنوں کو خراج تحسین پیش کرتے ہوئے کہا کہ کارکن کسی بھی سیاسی جماعت کا اصل سرمایہ ہوتے ہیں۔ کارکنوں کی محنت، قربانی اور ثابت قدمی کے باعث پارٹی مضبوط ہوتی ہے۔ انہوں نے کہا کہ وہ کارکنوں کی عزت اور ان کے مسائل کے حل کو بھی اپنی ترجیحات میں شامل رکھیں گے۔
اس موقع پر دیگر مقررین نے راجہ محمد ریاست خان کو وزیر حکومت بننے پر مبارکباد دیتے ہوئے کہا کہ ان کا آبائی حلقہ انتخاب میں پہنچنے پر ہزاروں افراد کا والہانہ استقبال اس امر کا واضح ثبوت ہے کہ عوام اپنے منتخب نمائندے سے کس قدر محبت اور توقعات وابستہ کیے ہوئے ہیں۔ مقررین نے کہا کہ راجہ محمد ریاست خان نے سیاسی سفر میں عوام سے اپنا رابطہ قائم رکھا اور یہی وجہ ہے کہ آج ان کے استقبال کے لیے ہر طبقہ فکر سے تعلق رکھنے والے افراد بڑی تعداد میں موجود ہیں۔
انہوں نے امید ظاہر کی کہ راجہ محمد ریاست خان حکومت میں اپنی ذمہ داریوں کو احسن انداز میں نبھاتے ہوئے نہ صرف حلقہ انتخاب بلکہ آزاد کشمیر کے عوام کی خدمت میں اپنا بھرپور کردار ادا کریں گے۔
راجہ محمد ریاست خان کی آبائی حلقے آمد کے موقع پر مختلف مقامات پر کارکنوں کی بڑی تعداد کی شرکت اور شاندار استقبال نے سیاسی فضا کو انتہائی پرجوش بنا دیا۔ مسلم لیگ (ن) کے پرچموں، نعروں، ڈھول کی تھاپ اور پھولوں کی بارش کے باعث پورا علاقہ جشن کا منظر پیش کرتا رہا۔