جدہ: تحریک تحفظ ختم نبوت آزاد کشمیر کے رہنماؤں کے اعزاز میں شاندار عشائیہ، اوورسیز کشمیری کمیونٹی کی بھرپور شرکت
جدہ (معروف حسین) اوورسیز کشمیری بزنس مین راجہ ریاض نے تحریک تحفظ ختم نبوت آزاد کشمیر کے مرکزی رہنماؤں حافظ محمد مقصود اور مولانا رضوان کے اعزاز میں ایک پروقار استقبالیہ اور عشائیے کا انعقاد کیا، جو عقیدہ ختم نبوت کے تحفظ کے لیے اوورسیز کمیونٹی کے عزم، محبت اور وابستگی کا شاندار مظہر ثابت ہوا۔
تقریب میں سعودی عرب کے مختلف شہروں سے تعلق رکھنے والی سیاسی، سماجی اور کاروباری شخصیات نے شرکت کی اور اس عظیم مقصد کے لیے اپنی حمایت کا اعادہ کیا۔ اس موقع پر تحریک کے رہنماؤں نے عقیدہ ختم نبوت کی اہمیت، آزاد کشمیر میں قادیانی فتنے کی سرگرمیوں، اور ان کے سدباب کے لیے کی جانے والی کوششوں پر روشنی ڈالی۔ انہوں نے اوورسیز کشمیریوں سے اپیل کی کہ وہ آزاد کشمیر کی ووٹر لسٹوں میں قادیانیوں کو مسلمانوں سے الگ کرنے کے لیے اپنی آواز بلند کریں اور اس جدوجہد میں اپنا مؤثر کردار ادا کریں۔
تقریب کے شرکاء میں انجینئر عارف مغل، سردار اشفاق خان (صدر مسلم کانفرنس)، شریف زمان راجہ، راجہ شمروز، سردار مہتاب سرور، انجینئر نعمان تصدق، قمر مشتاق، مکہ مکرمہ سے خواجہ گلزار اور میڈیا کے نمایاں افراد، جن میں عبداللہ (اردو پوائنٹ) اور حسن بٹ شامل تھے، نے شرکت کی اور تحریک کے مشن کی مکمل حمایت کا یقین دلایا۔
میزبان راجہ ریاض نے اپنے خطاب میں تحریک تحفظ ختم نبوت آزاد کشمیر کی خدمات کو خراج تحسین پیش کرتے ہوئے کہا کہ یہ تحریک امت مسلمہ کے ایمان اور عقیدے کے تحفظ کی امین ہے۔ انہوں نے حافظ محمد مقصود اور مولانا رضوان کو جدہ آمد اور عمرہ کی سعادت حاصل کرنے پر مبارکباد پیش کی اور اس جدوجہد میں ہر ممکن تعاون کی یقین دہانی کرائی۔
حافظ محمد مقصود نے تقریب کے میزبان اور شرکاء کا تہہ دل سے شکریہ ادا کرتے ہوئے کہا کہ اوورسیز کمیونٹی اپنے ملک کے سفیر ہیں، جو اپنے خلوص اور محبتوں سے اپنے وطن کے لیے محبت کا اظہار کرتے ہیں۔ انہوں نے میزبان راجہ ریاض کی جانب سے استقبالیہ کے شاندار انتظامات کو سراہتے ہوئے کہا کہ ایسے اجتماعات نہ صرف ہمارے اتحاد کا مظہر ہیں بلکہ ختم نبوت کے تحفظ کی جدوجہد کو تقویت دیتے ہیں۔
تقریب کے اختتام پر تحریک تحفظ ختم نبوت آزاد کشمیر کی جانب سے راجہ ریاض کو تحریک کی خصوصی شیلڈ اور آئینی و قانونی جدوجہد پر مبنی کتاب بطور اعزاز پیش کی گئی۔ یہ شاندار تقریب اتحاد و اخوت، عقیدے کے تحفظ، اور جدوجہد کی ایک نئی امنگ کا پیغام لے کر اختتام پذیر ہوئی۔