بھارتی جارحیت کے تناظر میں آزاد کشمیر حکومت کا ہنگامی اجلاس،اہم فیصلے
مظفرآباد(کشمیر ایکسپریس نیوز)وزیراعظم آزاد حکومت ریاست جموں و کشمیر چوہدری انوارالحق کی زیرصدارت حالیہ بھارتی حملوں کے تناظر میں پیدا ہونے والی صورتحال سے نمٹنے کے لئے اعلیٰ سطح اجلاس منعقد ہوا. اجلاس میں موسٹ سینئر وزیر کرنل ریٹائرڈ وقار احمد نور, وزیر اطلاعات پیر مظہر سعید شاہ, وزیر صحت عامہ نثار انصر ابدالی, چیف سیکرٹری, آئی جی اور دیگر متعلقہ حکام نے شرکت کی.
اجلاس میں مرکزی ایمرجنسی ریسپانس سنٹر قائم کر دیا گیا ، ہنگامی صورتحال کے پیش نظر ایمرجنسی ریسپانس سنٹر 24 گھنٹے کام کرے گا ، ایمرجنسی رسپانس سنٹر میں تینوں ڈویژن کے کمشنرز, ڈی آئی جی صاحبان, ڈی سی صاحبان, اور ایس ایس پی صاحبان شامل ہونگے.
مرکزی ریسپانس سنٹر صورتحال بارے وزیراعظم کو رپورٹ پیش کرے گا. اجلاس میں ایمرجنسی ہیلتھ رسپانس سنٹر اور انفارمیشن ڈیپارٹمنٹ میں ایمرجنسی انفارمیشن ریسپانس سنٹر قائم کرنے کی ہدایات بھی جاری کی گئیں ، اجلاس میں فیصلہ کیا گیا کہ ایمرجنسی ہیلتھ ریسپانس سنٹر اور پی آئی ڈی ایمرجنسی رسپانس سنٹر ، قائم مرکزی ریسپانس سنٹر سے مکمل رابطہ میں رہیں گے.
یہ سنٹرز 24 گھنٹے کام کریں گے اور ہنگامی صورتحال بارے مفصل آگاہ رکھیں گے ، اس موقع پر اجلاس سے خطاب میں وزیراعظم آزاد کشمیر چوہدری انوار الحق نے کہا کہ بھارتی جارحیت کی بدولت لائن آف کنٹرول پر شہداء اور زخمی ہونے والے افراد کے ورثاء کی بھرپور مدد کی جائے اور زخمیوں کی فور طبی امداد کو بھی ہر ممکن طور پر یقینی بنایا جائے.
وزیراعظم آزاد کشمیر نے کہا کہ لائن آف کنٹرول پر تمام سہولیات کی فراہمی کو ہر ممکن طور پر یقینی بنایا جائے ، خوراک اور ادویات سمیت تمام جملہ سہولیات کو بھی یقینی بنایا جائے ، وزیراعظم نے مرکزی رسپانس سینٹر کو ہدایت کی کہ بھارتی جارحیت کی بدولت ہونے والے مال مویشیوں اور مکانات کے نقصانات کا ڈیٹا اکٹھا کیا جائے اور شہریوں کی ہر ممکن امداد کے لیے اقدامات اٹھائے جائیں ،
وزیراعظم نے کہا کہ صورتحال کے جائزے کے لیے کابینہ کی ایمرجنسی رسپانس کمیٹی فوری اجلاس بلائے اور صورتحال کو دیکھتے ہوئے فوری منصوبہ بندی کے لیے اقدامات اٹھائے ، لائن آف کنٹرول کے حلقوں میں بی ایچ یوز اور دیگر صحت کی مراکز میں ادویات سمیت عملہ کی کمی کو 24 گھنٹے میں پورا کیا جائے گا
وزیراعظم آزاد کشمیر نے واضح کیا کہ بھارتی جارحیت قبول نہیں ، لائن آف کنٹرول کے حلقوں میں بی ایچ یوز اور دیگر صحت کی مراکز میں ادویات سمیت عملہ کی کمی کو 24 گھنٹوں میں پورا کیا جائے۔