آپریشن ‘بنیان المرصوص’ کا آغاز , پاکستان کی بھارت پر جوابی کارروائی، نئی دہلی میں پاکستانی ڈرونز کی پروازیں
اسلام آباد : سکیورٹی ذرائع کے مطابق پاکستان نے دشمن کی جارحیت کا مؤثر جواب دیتے ہوئے بھارت کے خلاف جوابی کارروائی کا آغاز کر دیا ہے۔ “آپریشن بنیان المرصوص” کے تحت بھارت کے متعدد حساس اور عسکری اہداف کو نشانہ بنایا گیا ہے، جب کہ بھارتی دارالحکومت نئی دہلی کی فضاؤں میں پاکستانی ڈرونز کی پروازیں جاری ہیں۔
ذرائع کے مطابق فجر کے وقت شروع ہونے والے اس آپریشن میں پاکستان کی جانب سے “فتح ون” میزائل فائر کیا گیا، جس کے نتیجے میں بھارت کے اہم عسکری مراکز — ادھم پور، پٹھان کوٹ ائیر بیس اور براہموس میزائل اسٹوریج — مکمل طور پر تباہ کر دیے گئے۔
سکیورٹی ذرائع کا کہنا ہے کہ پاکستان کی کارروائی منظم، مؤثر اور دشمن کے خلاف ایک واضح پیغام ہے کہ کسی بھی جارحیت کا جواب فوری اور بھرپور دیا جائے گا۔ اب تک بھارت میں 12 مختلف اہداف کو کامیابی سے نشانہ بنایا جا چکا ہے۔
پاکستانی ڈرونز کی نئی دہلی میں موجودگی نے بھارتی دفاعی نظام کی کمزوری کو بے نقاب کر دیا ہے، اور مقامی میڈیا کے مطابق نئی دہلی میں غیر معمولی سکیورٹی ہائی الرٹ ہے۔
حکام کا کہنا ہے کہ پاکستان کی کارروائیاں عالمی قوانین اور دفاعی حکمتِ عملی کے عین مطابق ہیں، اور یہ آپریشن اُس وقت تک جاری رہے گا جب تک دشمن کی جارحیت کا مکمل سدباب نہ ہو جائے۔