سندھ میں کرکٹ ٹرائلزکاکامیاب انعقاد؛پنجاب میں ٹرائلزکاآغاز

سندھ میں کرکٹ ٹرائلز کا کامیاب انعقاد؛ پنجاب میں ٹرائلز کا آغاز

سندھ کے کرکٹ ٹرائلزمیں وزیراعظم یوتھ پروگرام اور ایچ ای سی کے تحت 48 ہزار سے زائد نوجوانوں کی شرکت

اسلام آباد(سٹاف رپورٹر) وزیراعظم یوتھ پروگرام کے تحت اور ہائیر ایجوکیشن کمیشن کے تعاون سے، لاہور قلندرز کے اشتراک سے سندھ بھر میں کرکٹ ٹیلنٹ ہنٹ ٹرائلز کا کامیاب انعقاد مکمل ہو گیا ہے۔ ان ٹرائلز میں 48 ہزار سے زائد نوجوان کرکٹرز نے بھرپور شرکت کی۔

یہ ٹرائلز سندھ کے پانچ اہم مقامات پر منعقد کیے گئے، جن میں کراچی، حیدرآباد، شہید بینظیرآباد، لاڑکانہ اور سکھر شامل ہیں۔ ان مقامات پر نوجوانوں کی بڑی تعداد میں شرکت نے اس بات کو واضح کر دیا ہے کہ سندھ میں کرکٹ کا بے پناہ ٹیلنٹ موجود ہے۔

ٹرائلز ٹیلنٹ ہنٹ یوتھ اسپورٹس لیگ کا حصہ ہیں جس کا مقصد نوجوان کرکٹرز کو ایک منظم، میرٹ پر مبنی اور مساوی مواقع فراہم کرنا ہے تاکہ وہ اپنے ٹیلنٹ کو اجاگر کر سکیں۔

سندھ میں ٹرائلز کی کامیابی کے بعد، پنجاب کے نوجوانوں کے لیے ٹرائلز 25 جولائی 2025 سے شروع کیے جا رہے ہیں۔ یہ ٹرائلز بہاولپور سے شروع کیے جا رہے ہیں، اس کے بعد ملتان، فیصل آباد، سیالکوٹ، لاہور، راولپنڈی اور جہلم میں منعقد ہوں گے۔

اقدام پاکستان میں کھیلوں، خاص طور پر کرکٹ، کو نچلی سطح سے دوبارہ زندہ کرنے کی ایک جامع کوشش ہے۔ لاہور قلندرز کی پیشہ ورانہ معاونت اور ہائیر ایجوکیشن کمیشن اور وزیراعظم یوتھ پروگرام کی ادارہ جاتی سرپرستی سے یہ ٹیلنٹ ہنٹ ایک نئے دور کی نشاندہی کرتا ہے، ایک ایسا دور جو کھیل، نظم و ضبط، اور ڈسپلن کو فروغ دیتا ہے۔