پاک فضائیہ کا بڑا وار، بھارت کا جدید S-400 دفاعی نظام تباہ
پاک فضائیہ نے دشمن کو زبردست جھٹکا دیتے ہوئے بھارت کا جدید فضائی دفاعی نظام S-400 مکمل طور پر تباہ کر دیا۔ پاکستانی فضائیہ کے جے ایف 17 تھنڈر طیاروں نے ہائپر سونک میزائل کے ذریعے کارروائی کرتے ہوئے بھارتی دفاعی ڈھال کا سب سے طاقتور ہتھیار ختم کر دیا۔
ذرائع کے مطابق S-400 کی تباہی آپریشن بُنْيَان مَّرْصُوْص کا حصہ ہے، جس کے تحت پاکستان نے بھارت کے متعدد فوجی اور مواصلاتی اہداف کو نشانہ بنایا۔ ان میں ادھم پور، آدم پور، شیر کوٹ، بھٹنڈا اور سرسہ جیسے اہم ایئر بیسز، ملٹری چیک پوسٹس اور اڑی سپلائی ڈپو شامل ہیں۔
پاکستان نے مہاراشٹرا کی پاور گرڈ کو بھی سائبر حملے میں نشانہ بنایا، جس کے نتیجے میں ریاست کا بجلی کا نظام مکمل طور پر بند ہو گیا، جبکہ بھارتی ملٹری سیٹلائٹ کو بھی جام کر دیا گیا۔ اس کے علاوہ گجرات کی فضائی حدود میں پاکستانی ڈرونز کئی گھنٹے تک پرواز کرتے رہے۔
S-400 کیا ہے؟
بھارت کا S-400 سسٹم روس سے خریدا گیا ایک جدید ترین فضائی دفاعی نظام ہے، جو ایک وقت میں 300 اہداف کو ٹریس اور 36 کو بیک وقت نشانہ بنانے کی صلاحیت رکھتا ہے۔ یہ نظام کروز میزائل، بیلسٹک میزائل، جنگی طیاروں اور ڈرونز کو بھی مار گرانے کی اہلیت رکھتا ہے، اور 4.8 کلومیٹر فی سیکنڈ کی رفتار سے آنے والے اہداف کو روک سکتا ہے۔
بھارت نے 2018 میں یہ نظام 5.5 بلین ڈالر کے معاہدے کے تحت روس سے حاصل کیا تھا، اور اس وقت ملک بھر میں تین ایس 400 یونٹس نصب کیے گئے ہیں۔ پاکستان کے مطابق حالیہ کارروائی میں ایک یونٹ مکمل طور پر تباہ کر دیا گیا، جس کی مالیت تقریباً 1.5 بلین ڈالر ہے۔
بھارت کی اسٹریٹیجک برتری کا نشان سمجھے جانے والے S-400 کی تباہی نہ صرف فوجی بلکہ نفسیاتی طور پر بھی بڑا دھچکا ہے۔ پاکستانی کارروائی سے یہ ظاہر ہوا ہے کہ جدید ٹیکنالوجی کے باوجود دفاعی نظام ناقابل تسخیر نہیں ہوتے، خاص طور پر جب دشمن کی تیاری مکمل اور حملہ غیر متوقع ہو۔
