آل پاکستان انٹر بورڈ گرلز اسپورٹس گالا 2025 شاندار انداز میں اختتام پذیر
لاہور بورڈ کی شاندار کارکردگی، اسلام آباد میں جوش و خروش سے بھرپور تقریب اختتام پذیر
اسلام آباد(رازق بھٹی)آل پاکستان انٹر بورڈ گرلز اسپورٹس گالا 2025 شاندار کامیابی کے ساتھ اختتام پذیر ،اختتامی تقریب پاکستان اسپورٹس بورڈ کے نصیر بندہ ہاکی اسٹیڈیم اسلام آباد میں منعقد ہوئی ،ایونٹ انٹر بورڈز اسپورٹس کمیٹی (IBSC) کے زیر انتظام اور انٹر بورڈز کوآرڈینیشن کمیشن (IBCC) کے تحت منعقد کیا گیا
ایونٹ کی میزبانی فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) نے کی۔ 4 جنوری سے 7 جنوری 2025 تک جاری رہنے والے اس ایونٹ میں ملک بھر سے 19 تعلیمی بورڈز کی ٹیموں نے حصہ لیا اور نوجوان خواتین کھلاڑیوں کو اپنی صلاحیتوں اور کھیل کے جذبے کے اظہار کے لیے ایک شاندار پلیٹ فارم فراہم کیا
گالا میں بیڈمنٹن، ٹیبل ٹینس، ہاکی اور ایتھلیٹکس جیسے دلچسپ مقابلے شامل تھے، جن میں کھلاڑیوں نے شاندار کارکردگی دکھاتے ہوئے شائقین کو محظوظ کیا اور حقیقی مسابقتی جذبہ اجاگر کیا۔
بیڈمنٹن کے مقابلے میں گوجرانوالہ بورڈ نے پہلی پوزیشن حاصل کی، جبکہ لاہور بورڈ اور اسلام آباد بورڈ بالترتیب دوسری اور تیسری پوزیشن پر رہے۔ ٹیبل ٹینس میں لاہور بورڈ فاتح رہا، جبکہ ایبٹ آباد اور اسلام آباد بورڈز نے دوسری اور تیسری پوزیشن حاصل کی۔
ہاکی میں لاہور بورڈ نے میدان مار لیا، مردان اور اسلام آباد بورڈز نے دوسری اور تیسری پوزیشنز حاصل کیں۔ ایتھلیٹکس کے مقابلے میں لاہور بورڈ نے پہلی پوزیشن حاصل کی، فیصل آباد بورڈ دوسری پوزیشن پر رہا، جبکہ اسلام آباد اور میرپور بورڈز نے تیسری پوزیشن شیئر کی۔
لاہور بورڈ کی مجموعی شاندار کارکردگی نے انہیں اوورآل چیمپئن اور بہترین ایتھلیٹ کے اعزاز کا حق دار ٹھہرایا۔اختتامی تقریب کے موقع پر آئی بی سی سی کے ایگزیکٹو ڈائریکٹر اور تقریب کے مہمانِ خصوصی ڈاکٹر غلام علی ملاح نے کھلاڑیوں کی بھرپور شرکت کو سراہا اور جیتنے والوں کو ان کی شاندار کامیابیوں پر مبارکباد دی۔
انہوں نے اس ایونٹ کو نوجوان کھلاڑیوں کے اتحاد، محنت اور صلاحیتوں کی عکاسی قرار دیا۔ فیڈرل بورڈ کے چیئرمین ڈاکٹر اکرام علی ملک نے تمام شریک بورڈز کا شکریہ ادا کرتے ہوئے کہا کہ ان کی کوششوں نے اس ایونٹ کو ایک شاندار اور یادگار تقریب بنایا۔ انہوں نے ایسے ایونٹس کو طلبہ میں ٹیم ورک، عزم اور بہترین کارکردگی کو فروغ دینے کا ذریعہ قرار دیا۔
