وفاقی وزیر تعلیم کا فیڈرل بورڈ کا دورہ ،بورڈ کے قیام پر روشنی ڈالی
اسلام آباد(سٹاف رپورٹر) وفاقی وزیر تعلیم ڈاکٹر خالد مقبول صدیقی کا فیڈرل بورڈ آف انٹرمیڈیٹ اینڈ سیکنڈری ایجوکیشن (فیڈرل بورڈ) کا دورہ ، چیئرمین فیڈرل بورڈ، ڈاکٹر اکرام علی ملک اور سینئر افسران کی ٹیم نے استقبال کیا، جو ادارے کی علمی خدمات اور تعلیمی میدان میں قومی عزم کی عکاسی کرتا ہے۔ چیئرمین نے بورڈ کے قیام، اس کی تشکیل، دائرۂ کار، اور قومی تعلیمی نظام میں اس کے مؤثر کردار پر روشنی ڈالی۔ انہوں نے بتایا کہ فیڈرل بورڈ نے ۲۰۱۵ میں پی ایس ڈی پی کے فنڈڈ ایک تعلیمی پراجیکٹ “پینسل سے پکسل کی طرف سفر” کے ویژن کے ساتھ شروع کیا، جس کا مقصد ایک شفاف، ٹیکنالوجی پر مبنی امتحانی نظام اور مؤثر سروس ڈیلیوری کے ماڈل کو فروغ دینا تھا۔
چیئرمین نے بورڈ کی ٹیکنالوجی میں شمولیت اور سروس اصلاحات میں اب تک ہونے والی پیش رفت کو اجاگر کیا، جو اس بات کا ثبوت ہے کہ فیڈرل بورڈ بین الاقوامی معیار کے مطابق خود کو جدید خطوط پر استوار کرنے کے عزم پر کاربند ہے۔
وفاقی وزیر نے مختلف شعبہ جات کا دورہ کیا، جن میں جدید پرنٹنگ یونٹ، ای شیٹس کی اسکیننگ اور پروسیسنگ کا ڈیجیٹل ایریا، اور ون ونڈو سہولت مرکز شامل تھے۔ جب انہوں نے فیڈرل بورڈ کا مکمل ڈیجیٹل سروس ڈیلیوری سسٹم دیکھا، تو وہ اس کی شفافیت، رفتار، اور پیشہ ورانہ اہلیت سے بے حد متاثر ہوئے۔
وفاقی وزیر تعلیم نے کہا کہ فیڈرل بورڈ کے یہ جدید اقدامات ملک کے دیگر تعلیمی بورڈز کے لیے قابلِ تقلید ہیں۔ انہوں نے اس عزم کا اظہار کیا کہ وفاقی حکومت ملک بھر کے صوبائی بورڈز کو اس ماڈل کو اپنانے میں بھرپور تعاون فراہم کرے گی، تاکہ امتحانی نظام میں ہم آہنگی اور معیار کی بہتری یقینی بنائی جا سکے۔ انہوں نے مزید کہا کہ اس قسم کے اقدامات تعلیمی معیار کو بہتر بنانے میں کلیدی کردار ادا کر سکتے ہیں۔
