ایف پی سی سی آئی کا اسلام آباد پولیس کیلئے صحت اور فٹنس گالا
اسلام آباد(کشمیر ایکسپریس نیوز) ایف پی سی سی آئی کی پولیس اور سول انتظامیہ کی اسٹینڈنگ کمیٹی کے زیر اہتمام اسلام آباد پولیس لائنز میں پہلا صحت اور فٹنس گالا منعقد ہوا۔
اس تقریب کا مقصد پولیس فورس، سول انتظامیہ، اور کاروباری برادری کے درمیان تعاون کو فروغ دینا اور صحت مند طرز زندگی اپنانے کی اہمیت کو اجاگر کرنا تھا۔ تقریب کے مہمانانِ خصوصی میں چیئرمین سینیٹ سید یوسف رضا گیلانی، گورنر پنجاب سردار سلیم حیدر خان، سینیٹر رانا محمود الحسن، ایم این اے ڈاکٹر طارق فضل چوہدری، چیئرمین سی ڈی اے علی رندھاوا، اور ایف پی سی سی آئی کے صدر عاطف اکرام شیخ شامل تھے۔ مختلف ممالک کے سفیروں، میڈیا نمائندگان، اور اعلیٰ پولیس افسران نے بھی تقریب میں شرکت کی۔
چیئرمین سینیٹ سید یوسف رضا گیلانی نے پولیس فورس کی خدمات کو خراج تحسین پیش کرتے ہوئے کہا کہ قوم ان کی قربانیوں کو ہمیشہ یاد رکھے گی۔ انہوں نے کہا کہ پولیس اہلکار اپنی جانوں کا نذرانہ پیش کرکے عوام کے تحفظ کو یقینی بناتے ہیں۔
ایف پی سی سی آئی کے چیئرمین یحییٰ شیخ نے شہداء کے خاندانوں سے اظہار یکجہتی کرتے ہوئے کہا کہ ان کا نقصان پوری قوم کا نقصان ہے۔ انہوں نے عوام میں صحت مند طرز زندگی اپنانے کی ضرورت پر زور دیا اور کہا کہ ایسی تقریبات سے معاشرتی ہم آہنگی کو فروغ ملتا ہے۔
گالا میں مختلف سرگرمیوں کا انعقاد کیا گیا، جن میں فٹنس سیشنز، صحت سے متعلق مشاورت، اور آگاہی پروگرامز شامل تھے۔ مقررین نے عوامی اور نجی شعبے کے درمیان شراکت داری کو مضبوط بنانے پر زور دیا تاکہ صحت اور فٹنس کے حوالے سے مزید اقدامات کیے جا سکیں۔ تقریب پولیس فورس کی قربانیوں کو خراج تحسین پیش کرنے کے ساتھ ساتھ معاشرے میں صحت مند طرز زندگی کے فروغ کے لیے ایک اہم قدم ہے۔
