باغ ساہلیاں ملدیالاں کے بزرگ محمد اسحاق خان پر حملہ، تشدد اور رقم چھیننے کا واقعہ
باغ (بیورو رپورٹ) باغ ساہلیاں ملدیالاں کے سفید ریش بزرگ محمد اسحاق خان پر گزشتہ روز تین نامعلوم افراد نے حملہ کر دیا۔ متاثرہ بزرگ کے مطابق نویدِ اطوار اور عمر فاروق نامی دو نوجوانوں کے ساتھ ایک نامعلوم شخص نے انہیں راستے میں روک کر وحشیانہ تشدد کا نشانہ بنایا۔
محمد اسحاق خان نے بتایا کہ حملہ آوروں نے ان کے سر پر آہنی راڈ سے وار کیا اور جسم کے دیگر حصوں پر بھی شدید چوٹیں آئیں، جبکہ وہ ان سے تین لاکھ سے زائد مالیت کی رقم بھی چھین کر فرار ہو گئے۔ مقامی افراد نے انہیں فوری طور پر اسپتال منتقل کیا، جہاں وہ ایک روز تک زیر علاج رہے۔
بزرگ شہری کا کہنا تھا کہ کچھ عرصہ قبل ان کے گھر میں ہونے والی لاکھوں مالیت کی چوری کا کیس بھی ابھی تک حل طلب ہے۔ انہوں نے وزراء حکومت، آئی جی پولیس اور ایس پی باغ سے اپیل کی کہ انہیں انصاف دلایا جائے، ملزمان کو سخت سزا دی جائے اور چھینی گئی رقم واپس دلوائی جائے تاکہ آئندہ کسی بزرگ پر ہاتھ اٹھانے کی جرأت نہ ہو۔
پولیس تھانہ باغ میں واقعے کی رپورٹ درج کر لی گئی ہے، اور حکام نے یقین دہانی کرائی ہے کہ جلد ملزمان کو گرفتار کر لیا جائے گا۔
