وفاقی وزیر ریا ض حسین پیرزادہ نے پی ایچ اے فاؤنڈیشن کے ڈیجیٹل سروسز پیکیج کا افتتاح کر دیا
اسلام آباد(سٹاف رپورٹر)وفاقی وزیر برائے ہاؤسنگ اور ورکس میاں ریا ض حسین پیرزادہ نے پاکستان ہاؤسنگ اتھارٹی فاؤنڈیشن (پی ایچ اے ایف) کی طرف سے اپنے ارکان اور الاٹیز کو سہولت فراہم کرنے کے لیے شروع کیے گئے ڈیجیٹل اقدامات کے ایک جامع پیکیج کا باضابطہ افتتاح کیا۔ اس موقع پر سیکریٹری ہاؤسنگ اور ورکس ڈاکٹر شہزاد خان بنگش، پی ایچ اے ایف کے افسران اور نیشنل پولیس فاؤنڈیشن کے نمائندگان بھی موجود تھے، جو اس سروسز پر مبنی پیکیج کے ڈیزائن میں شامل کار رہے تھے۔
پی ایچ اے ایف کے منیجنگ ڈائریکٹر شاہد حسین نے شرکاء کو نئے اقدامات پر بریفنگ دی، جس میں بتایا گیا کہ کس طرح فنڈ کی منتقلی اور ریکارڈز کو ڈیجیٹل بنانے سے ایک مضبوط ڈیٹا بیس تیار ہو گا، جو تیز تر اور بہتر فیصلہ سازی میں مدد فراہم کرے گا۔
اس اقدام کی اہم خصوصیات میں پی ایچ اے ایف ڈیجیٹل پورٹل اور پی ایچ اے ایف مینٹیننس سروسز پورٹل کا آغاز شامل ہے، جو پی ایچ اے ایف کے الاٹیز کو خصوصاً اوورسیز پاکستانیوں اور مستقبل کے ہاؤسنگ منصوبوں میں سرمایہ کاروں کے لیے آ سان رسائی، شفافیت اور سہولت فراہم کرنے کے لیے ڈیزائن کیے گئے ہیں۔
یہ خدمات فاؤنڈیشن کے عزم “رہائشیوں کو با اختیار بنانا اور طریقہ کار کو سادہ بنانا” کی عکاسی کرتی ہیں۔ ان کا مقصد یہ ہے کہ الاٹیز پی ایچ اے ایف کے ساتھ اپنے جائیداد سے متعلق امور کو دنیا کے کسی بھی کونے میں بیٹھ کر آسانی سے رسائی اور انتظام کر سکیں۔
پی ایچ اے ایف ڈیجیٹل پورٹل کی اہم خصوصیات میں شامل ہیں:
جائیداد کی تفصیلات، ادائیگی کے شیڈولز، تاریخ، اور الاٹمنٹ کی حیثیت تک حقیقی معلومات اور ان تک رسائی۔ قسطوں کی ادائیگی اور واجبات کے لیے آن لائن ادائیگی کی سہولت، اور اسکے ساتھ پورٹل کے ذریعے پروجیکٹ کی خبریں اور اپ ڈیٹس براہ راست فراہم کی جائیں گی۔ ممبرشپ خدمات اور آئندہ منصوبوں پر خصوصی انفارمیشن ، واجب الادا ادائیگیوں اور سرکاری اعلانات کے بارے میں خودکار الرٹس اور یاددہانیاں۔
جبکہ پی ایچ اے ایف مینٹیننس سروسز پورٹل کی اہم خصوصیات میں شامل ہیں:
یوٹیلیٹیز اور مینٹیننس چارجز کی آن لائن بل ادائیگیاں،
جائیداد کی حیثیت کی ٹریکنگ، تمام ضروری سروس اور مینٹیننس اپ ڈیٹس کے لیے حقیقی اطلاعات۔ اس کے علاوہ، پی ایچ اے ایف کی نئی ویب سائٹ کا آغاز کیا گیا ہے جو اب ایک مرکزی معلوماتی مرکز کے طور پر کام کرے گا، جس سے صارفین کے لیے رسائی اور شفافیت کو مزید بڑھایا جائے گا۔ وفاقی وزیر پیرزادہ اور سیکریٹری بنگش نے پی ایچ اے ایف کی ٹیم کی ان کی انتھک محنت کے لیے تعریف کی اور ان اقدامات کو حکومت کے ڈیجیٹل ٹرانسفارمیشن اور ای گورننس کے وژن سے ہم آہنگ قرار دیا۔
وفاقی وزیر پیرزادہ نے کہا، “یہ روایتی نظاموں سے جدید ڈیجیٹل پلیٹ فارمز کی جانب منتقلی نہ صرف مقامی اور اوورسیز شہریوں کو سہولت فراہم کرے گی بلکہ درست ڈیٹا فراہم کر کے غلط فہمیوں کو بھی دور کرے گی۔”
انہوں نے کہا کہ ہاؤسنگ کے تمام محکموں کو میرٹ پر مبنی نظام اپنانا چاہیے جو ڈیجیٹل سسٹم سے چل رہا ہو، کیونکہ ایسیے اقدامات اب عوامی خدمت کی کارکردگی اور ادارہ جاتی سالمیت کو یقینی بنانے کے لیے ضروری بن چکے ہیں۔
