بیرسٹرسلطان کوگن کیرج جنازے کیساتھ سپردِ خاک کیا جائیگا

صدر ریاست آزاد جموں و کشمیر بیرسٹر سلطان محمود چوہدری کو گن کیرج جنازے کے ساتھ سرکاری و فوجی اعزاز میں سپردِ خاک کیا جائے گا

میرپور (کشمیر ایکسپریس نیوز)صدر ریاست آزاد جموں و کشمیر جناب بیرسٹر سلطان محمود چوہدری کو ایک انتہائی اعلیٰ سرکاری اور فوجی اعزاز گن کیرج جنازہ کے ساتھ جنازہ گاہ لایا جائے گا۔ اس منفرد اور باوقار روایت کے تحت مرحوم کا تابوت قومی پرچم میں لپیٹ کر توپ کی گاڑی (Gun Carriage) پر رکھا جائے گا، جبکہ فوج کے جوان باقاعدہ جلوس کی صورت میں ساتھ چلیں گے اور مرحوم کو سلامی اور گارڈ آف آنر پیش کیا جائے گا۔

سرکاری ذرائع کے مطابق گن کیرج جنازے میں فوجی دستہ، گارڈ آف آنر، توپوں کی سلامی، اور قومی احترام کے ساتھ جلوس شامل ہوگا، جو کہ ریاست اور ملک کی جانب سے مرحوم کو دیے جانے والے غیر معمولی احترام کی علامت ہے۔ یہ روایت برطانوی فوجی رسومات سے مستعار ہے اور پاکستان میں صرف انتہائی اہم قومی رہنماؤں، سربراہانِ مملکت اور عظیم قومی خدمات انجام دینے والی شخصیات کو یہ اعزاز دیا جاتا ہے۔

پاکستان کی تاریخ میں یہ اعزاز بہت کم شخصیات کو نصیب ہوا ہے۔ بانیٔ پاکستان قائد اعظم محمد علی جناح کو گن کیرج جنازہ دیا گیا، جبکہ سابق صدر و آرمی چیف جنرل محمد ضیاء الحق کا جنازہ بھی گن کیرج پر ہوا۔ اسی طرح عظیم سماجی خدمت گزار عبدالستار ایدھی کو بھی گن کیرج جنازہ اور 19 توپوں کی سلامی دی گئی، جبکہ ڈاکٹر رتھ فاؤ کو بھی کراچی میں مکمل فوجی اعزاز کے ساتھ رخصت کیا گیا تھا۔

ذرائع کے مطابق صدر ریاست بیرسٹر سلطان محمود چوہدری کو یہ اعلیٰ اعزاز ان کی طویل سیاسی، سفارتی اور قومی خدمات، مسئلہ کشمیر کو عالمی سطح پر اجاگر کرنے میں اہم کردار، اور ریاستی و عوامی خدمت کے اعتراف کے طور پر دیا جا رہا ہے۔

دوسری جانب بیرونِ ملک مقیم کشمیریوں اور پاکستانیوں کے لیے امریکہ، برطانیہ، یورپ، مشرق وسطیٰ اور مقبوضہ کشمیر میں صدر ریاست بیرسٹر سلطان محمود چوہدری کی غائبانہ نمازِ جنازہ ادا کرنے کا بھی اعلان کیا گیا ہے، جہاں اوورسیز کشمیری بڑی تعداد میں شرکت کر کے مرحوم کے لیے دعائے مغفرت اور خراجِ عقیدت پیش کریں گے۔

واضح رہے کہ پاکستان میں عمومی طور پر جنازے اسلامی طریقۂ کار کے مطابق سادگی سے ادا کیے جاتے ہیں، جبکہ گن کیرج جنازہ ایک غیر معمولی اور نایاب اعزاز ہے جو صرف چند منتخب قومی شخصیات کو ہی دیا جاتا ہے۔ یہ اعزاز اس بات کی علامت ہے کہ مرحوم کی خدمات کو ریاست اور قوم کی جانب سے اعلیٰ ترین سطح پر تسلیم کیا گیا ہے۔

۔