اقبال کا پیغام ہماری نسلوں کے لیے مشعل راہ ہے،انوارالحق
مظفرآباد (کشمیر ایکسپریس نیوز) وزیر اعظم آزادحکومت ریاست جموں وکشمیرچوہدری انوارالحق نے حضرت علامہ اقبال کے یوم ولادت کے موقع پر اپنے خصوصی پیغام میں کہا کہ اقبال کا پیغام ہماری نسلوں کے لیے مشعل راہ ہے۔
انہوں نے کہا کہ ا قبال کی شاعری ایسا کارنامہ ہے جسکی مثال تاریخ میں بہت کم ہی مل سکتی ہے۔ وزیر اعظم نے کہا کہ اقبال نے پاکستان کا تصور پیش کیا اور ان کے مرد مومن اور قوم کے زندہ جاوید راہنما حضرت قائد اعظم کی قیادت میں مختصر عرصے میں مسلمانان ہند اپنے لیئے الگ وطن حاصل کرنے میں کامیاب ہوگئے
انہوں نے کہا کہ ہمارے لیے فخر کی بات ہے کہ علامہ اقبال کا تعلق بھی سرزمین جموں کشمیرسے تھا۔ انہوں نے ڈوگرہ آمریت کے خلاف جموں کشمیر کے مسلمانوں کی جدو جہد کی ہمیشہ بھر پور حمایت کی۔برصغیر کے مسلمانوں کیلئے جس وطن کا خواب علامہ اقبال مرحوم نے دیکھا تھا ریاست جموں و کشمیر اس کا لازمی حصہ تھی۔
وزیر اعظم نے کہا یہ انتہائی تکلیف د ہ بات ہے کہ خطہ جموں کشمیر اب تک پاکستان کا حصہ نہیں بن سکا اور جموں کشمیر کے مسلمان آج بھی زبوں حالی کا شکارہیں۔آج بھی جموں وکشمیر کے مسلمان بھارتی افواج کے ظلم و ستم کا شکار ہیں۔
لیکن آزادی کی منزل حاصل کرنے کے لیے انکے حوصلے مضبوط ہیں وہ اپنے حق خودارادیت کو حاصل کر کے رہیں گے۔انہوں نے کہامجھے پورا یقین ہے کہ شاعر مشرق کا خواب حقیقت بنے گا اور وہ دن دور نہیں جب حق و باطل کی اس جنگ میں جموں کشمیر کے مسلمان سرخرو ہونگے۔
//dailykashmirexpress.net/web/?p=2739″>صدرآزادکشمیر سےوزیراعظم کی ملاقات،اہم امور پر تبادلہ خیال
