پی ٹی آئی احتجاج کیخلاف درخواست ،اسلام آباد ہائیکورٹ کااظہار برہمی
اسلام آباد (کشمیر ایکسپریس نیوز) اسلام آباد ہائی کورٹ کے چیف جسٹس عامر فاروق حکومت اور انتظامیہ پر برہمی کا اظہار کیا ہے۔بدھ کو اسلام آباد ہائی کورٹ میں 24 نومبر کے پی ٹی آئی کے احتجاج کے خلاف اسلام آباد کے تاجروں کی توہینِ عدالت کی درخواست پر سماعت ہوئی۔
چیف جسٹس اسلام آباد ہائی کورٹ نے کہا کہ آپ نے امن و امان بحال کرنا تھا مگر آپ نے پورا اسلام آباد بند کر دیا، درخواست گزار نے کہا کہ ہمارے کاروبار کو چلنے دیں، آپ نے میڈیا پر ہر جگہ کہا کہ اسلام آباد ہائی کورٹ کے آرڈر پر ہم اجازت نہیں دے رہے۔
چیف جسٹس نے کہا کہ عدالت نے آپ سے کہا تھا کہ شہریوں، تاجروں اور مظاہرین کے بنیادی حقوق کا خیال رکھیں، ہم پی ٹی آئی سے بھی پوچھیں گے کہ عدالتی احکامات کی خلاف ورزی کیوں کی گئی؟ ۔
اسلام آباد ہائی کورٹ کے چیف جسٹس عامر فاروق نے کہا کہ پی ٹی آئی نے غلط کیا تو حکومت نے بھی تو غلط ہی کیا، درخواست گزار کا کیا قصور تھا؟ ان کے کاروبار کو کیوں بند کیا؟ ۔
سٹیٹ قونصل ملک عبدالرحمن نے کہا کہ کچھ رپورٹس آ گئی ہیں اور کچھ رپورٹس آنا باقی ہیں۔چیف جسٹس اسلام آباد ہائی کورٹ نے سٹیٹ قونصل پر برہمی کا اظہار کرتے ہوئے کہا کہ کیا آپ پہلی بار عدالت میں پیش ہوئے ہیں؟
یہ ماہرانہ رائے وہاں دینی تھی، آپ نے اسلام آباد کو ایسے بند کیا تھا کہ ججز سمیت میں بھی نہیں آ سکا، میں اپنے ہی آرڈر کا خود ہی شکار ہو گیا۔عدالت نے وزارتِ داخلہ سے رپورٹ طلب کرتے ہوئے کیس کی سماعت آئندہ ہفتے تک ملتوی کر دی۔
