گلگت بلتستان میں نئی شاہراہوں کی تعمیر، موٹروے پولیس اور ٹول پلازوں کیلئے حکمت عملی طے
وفاقی وزیر مواصلات سے گلگت بلتستان کے وزیر اعلیٰ کی ملاقات،اہم امور پر تبادلہ خیال
مانسہرہ، کاغان اور ناران کی موٹروے گیم چینجز، سیاحت کا فروغ بڑا خواب ہے:عبدالعلیم خان
وزیر اعلیٰ کی یقین دہانی،وفاقی سیکرٹر ی اور چیئرمین این ایچ اے دورہ کریں گے
اسلام آباد(سٹاف رپورٹر)وزیر اعلیٰ گلگت بلتستان حاجی گلبر خان اور وفاقی وزیر مواصلات عبدالعلیم خان کے مابین ہونے والی ملاقات میں صوبے میں شاہراہوں سمیت مختلف اہم امور پر تبادلہ خیال کیا گیا۔
وفاقی وزیر مواصلات نے کہاکہ مانسہرہ، کاغان اور ناران کی موٹروے گیم چینجر ثابت ہو سکتی ہے، سیاحت کی ترقی کے لئے گلگت، سکردو اور دیگر مقامات پر فائیو سٹار ہوٹل بننا چاہئیں۔
انہوں نے کہا کہ سیر و سیاحت اور قدرتی حسن سے مالا مال شمالی علاقہ جات کو خصوصی اہمیت حاصل ہے اور ہمیں سیاحوں کو زیادہ سے زیادہ سہولیات کی فراہمی یقینی بنانا ہوگی۔
وفاقی وزیر مواصلات عبدالعلیم خان نے اس امر کا اظہار کیا کہ گلگت بلتستان کی تمام شاہراہوں کو1122کی ایمرجنسی سروس سے منسلک کریں گے اور اس کے بعد ہیلی کاپٹر سروس شروع کرنا پڑی تو اُس سے بھی دریغ نہیں کریں گے۔
عبدالعلیم خان کا کہنا تھا کہ سیاحت کا فروغ میرا بڑا خواب ہے جس کے لئے سڑکوں کی تیزی سے تعمیر ضروری ہے تاکہ گلگت بلتستان کے پرُفضا مقامات پر سیاحت کو جدید ممالک کی طرز پر تشکیل دیا جا سکے۔
ملاقات میں گلگت بلتستان کے وزیر اعلیٰ حاجی گلبر خان نے موٹروے پولیس کی تعینات اور گزشتہ سال وفاقی وزیر مواصلات عبدالعلیم خان کی طرف سے کیے گئے تعاون اور شروع کیے گئے مختلف اقدامات پر اظہار تشکر کیا اور اپنی حکومت کی طرف سے نیشنل ہائی وے اتھارٹی سے ہر ممکن تعاون کی یقین دہانی کروائی۔
اجلاس میں طے پایا کہ وفاقی وزیر مواصلات عبدالعلیم خان کی ہدایت پر وفاقی سیکرٹری مواصلات اور چیئرمین این ایچ اے جلد گلگت بلتستان کا دورہ کریں گے اور وہاں کی صوبائی حکومت سے اجلاس منعقد کر کے حل طلب امور کو طے کیا جائے گا۔
وزیر اعلیٰ گلگت بلتستان نے صوبے میں مختلف شاہراہوں کی بھی نشاندہی کی جہاں فوری طور پر اقدامات کی ضرورت ہے جس پر وفاقی وزیر مواصلات نے ہدایت کی کہ محکمہ مواصلات کے افسران اپنے دورے کے دوران تمام امور کو خوش اسلوبی سے نمٹائیں۔
