پنڈی ٹیسٹ،انگلینڈ کو 9 وکٹوں سے شکست انگلینڈ کی ٹیم دوسری اننگز میں 112 رنز پر آؤٹ ہو گئی
راولپنڈی (رازق بھٹی)پاکستان نے پنڈی ٹیسٹ میں انگلینڈ کو 9 وکٹوں سے شکست دے کر ٹیسٹ سیریز بھی اپنے نام کر لی۔ پاکستانی اسپنرز کی عمدہ بولنگ کی بدولت انگلینڈ کی ٹیم دوسری اننگز میں صرف 112 رنز پر ڈھیر ہو گئی، جس کے بعد پاکستان کو جیت کے لیے 36 رنز کا ہدف ملا، جو اس نے ایک وکٹ کے نقصان پر پورا کر لیا۔
راولپنڈی کرکٹ اسٹیڈیم میں کھیلے گئے پنڈی ٹیسٹ میچ میں پاکستان نے 36 رنز کے ہدف کا تعاقب کیا۔ اننگز کا آغاز صائم ایوب اور عبداللہ شفیق نے کیا، مگر 14 رنز کے مجموعی اسکور پر صائم ایوب جیک لیچ کی گیند پر ایل بی ڈبلیو ہو کر 8 رنز بنا کر آؤٹ ہو گئے۔
صائم کے آؤٹ ہونے کے بعد شان مسعود وکٹ پر آئے اور فوراً تین گیندوں پر تین چوکے لگا دیے۔ اس کے بعد کپتان نے چھکا لگا کر ووننگ شارٹ کھیلا، انہوں نے محض 6 گیندوں پر 4 چوکوں اور ایک چھکے کی مدد سے 23 رنز بنائے۔
پنڈی ٹیسٹ ,تیسرے روز انگلینڈ نے اپنی دوسری اننگز 24 رنز 3 کھلاڑی آؤٹ سے شروع کی۔ جو روٹ اور ہیری بروک وکٹ پر موجود تھے، مگر نعمان علی نے 26 کے انفرادی اسکور پر ہیری بروک کو آؤٹ کیا اور پھر بین اسٹوکس کو بھی 3 رنز پر پویلین بھیج دیا۔
انگلینڈ کی چھٹی وکٹ 75 رنز پر گری، جیمی اسمتھ 3 رنز بنا کر ساجد خان کا شکار ہوئے۔ جو روٹ 33 رنز بنا کر 85 کے مجموعے پر نعمان علی کی گیند پر آؤٹ ہو گئے۔ اس کے بعد گس ایٹکنسن 97 رنز پر ساجد خان کا شکار بنے، اور انگلینڈ کی نویں وکٹ 106 رنز پر گری۔ ریحان احمد 7 رنز بنا کر ساجد خان کی گیند پر آؤٹ ہوئے، جبکہ آخری کھلاڑی جیک لیچ 10 رنز بنا کر نعمان علی کا شکار بنے۔
سعود شکیل کو پہلی اننگز میں شاندار سنچری بنانے پر میچ کا بہترین کھلاڑی قرار دیا گیا، جبکہ ساجد خان کو بہترین بولنگ پر سیریز کا بہترین کھلاڑی منتخب کیا گیا۔ نعمان علی نے سیریز میں 20 اور ساجد خان نے 19 کھلاڑیوں کو آؤٹ کیا، دونوں نے تین ٹیسٹ میچز کی سیریز کے دو میچز میں پاکستان کی نمائندگی کی۔
یاد رہے کہ پنڈی ٹیسٹ میں انگلینڈ نے پہلی اننگز میں 267 رنز اسکور کیے تھے، جبکہ پاکستان نے 344 رنز بنا کر 77 رنز کی برتری حاصل کی تھی۔ تین میچز کی سیریز ایک ایک سے برابر رہی۔ انگلینڈ نے پہلے ٹیسٹ میں پاکستان کو ایک اننگز اور 47 رنز سے شکست دی تھی جبکہ دوسرے ٹیسٹ میں پاکستان نے انگلینڈ کو 156 رنز سے ہرایا تھا۔ تقریباً ساڑھے تین سال بعد پاکستان نے اپنی سرزمین پر ٹیسٹ سیریز جیتی ہے۔ پاکستان نے آخری ہوم سیریز جنوری 2021 میں جنوبی افریقہ کے خلاف جیتی تھی۔
