ذاکراللہ چوھدری نے برمنگھم سٹی کونسل کے 116ویں اور ساتویں مسلم لارڈ مئیر کے طور پر حلف اُٹھا لیا، فل کونسل اجلاس تاریخی لمحات سے گونج اُٹھا
برمنگھم (کشمیر ایکسپریس نیوز)-یورپ کی دوسری بڑی کونسل Birmingham City Council میں ایک تاریخی اور یادگار لمحہ اس وقت دیکھنے میں آیا جب 116ویں اور ساتویں مسلم لارڈ مئیر Zakir Ullah Choudhry نے اپنے عہدے کا باقاعدہ حلف اُٹھا لیا۔ یہ تقریب نہ صرف برمنگھم کی سیاسی تاریخ کا اہم باب ثابت ہوئی بلکہ برطانیہ میں آباد مسلم کمیونٹی کے لیے بھی فخر، نمائندگی اور سیاسی شمولیت کی ایک مضبوط علامت بن کر سامنے آئی۔
فل کونسل اجلاس کے دوران اُس وقت جذباتی اور تاریخی منظر دیکھنے میں آیا جب سابق لارڈ مئیر Zafar Iqbal نے نئے لارڈ مئیر ذاکر اللہ چوہدری کو چیئر سنبھالنے کی دعوت دی۔ اس موقع پر نئے لارڈ مئیر نے مختصر وقفہ لیا اور تقریباً دس منٹ بعد جب وہ دوبارہ ہال میں داخل ہوئے تو ہال میں موجود تمام شرکاء نے کھڑے ہو کر پرتپاک انداز میں اُن کا استقبال کیا۔ اس استقبال نے نہ صرف ذاکر اللہ چوہدری کی سیاسی و سماجی مقبولیت کو ظاہر کیا بلکہ برمنگھم کی متنوع کمیونٹیز کے درمیان اتحاد اور احترام کی فضا کو بھی اجاگر کیا۔
تقریب کا آغاز تلاوتِ قرآن پاک سے کیا گیا جس نے پورے ماحول کو روحانی اور باوقار بنا دیا۔ بعدازاں لارڈ مئیر ذاکر اللہ چوہدری نے اپنے پیشرو ظفر اقبال اور اُن کی اہلیہ کو ان کی خدمات کے اعتراف میں ایوارڈز پیش کیے اور انہیں عزت و احترام کے ساتھ رخصت کیا۔ اس موقع پر سابق لارڈ مئیر کی خدمات کو بھی بھرپور انداز میں سراہا گیا۔
اپنے خطاب میں لارڈ مئیر ذاکر اللہ چوہدری نے تمام نو منتخب کونسلرز کو مبارکباد دیتے ہوئے اس بات پر زور دیا کہ سیاسی اختلافات سے بالاتر ہو کر برمنگھم کی ترقی، معاشی استحکام، کمیونٹی ہم آہنگی اور شہری مسائل کے حل کے لیے مشترکہ طور پر کام کرنا وقت کی اہم ضرورت ہے۔ انہوں نے خاص طور پر “مکس کونسل” کے تصور کو اجاگر کرتے ہوئے کہا کہ مختلف سیاسی جماعتوں اور آزاد کونسلرز کے درمیان تعاون ہی شہر کے بہتر مستقبل کی ضمانت بن سکتا ہے۔
فل کونسل کے اجلاس میں سیاسی، سماجی، مذہبی، کاروباری اور کمیونٹی حلقوں سے تعلق رکھنے والی اہم شخصیات نے شرکت کی۔ لارڈ مئیر کی تقریر کے دوران متعدد بار ہال تالیوں سے گونجتا رہا، جس سے ان کی قیادت پر اعتماد اور حمایت کا واضح اظہار دیکھنے میں آیا۔
تقریب کے دوران ایک اور اہم اعلان یہ بھی کیا گیا کہ تجربہ کار کونسلر Shafique Shah کو پانچویں مرتبہ ڈپٹی لارڈ مئیر مقرر کیا جا رہا ہے، جسے حاضرین نے بھرپور انداز میں سراہا۔ سیاسی مبصرین کے مطابق یہ فیصلہ کونسل میں تجربے، تسلسل اور انتظامی استحکام کی علامت سمجھا جا رہا ہے۔
تقریب میں شریک مختلف کونسلرز نے CNI News Network Ltd سے گفتگو کرتے ہوئے نئے لارڈ مئیر ذاکر اللہ چوہدری کو مبارکباد پیش کی اور اس عزم کا اظہار کیا کہ وہ برمنگھم کی بہتری، کمیونٹی مسائل کے حل اور شہری خدمات کے معیار کو بہتر بنانے کے لیے ایک دوسرے کے ساتھ مکمل تعاون کریں گے۔
سیاسی تجزیہ کاروں کے مطابق ذاکر اللہ چوہدری کا لارڈ مئیر منتخب ہونا اس بات کی عکاسی کرتا ہے کہ برطانیہ میں مسلم کمیونٹی نہ صرف سماجی و معاشی میدان میں بلکہ سیاسی قیادت میں بھی اپنا مؤثر کردار ادا کر رہی ہے۔ برمنگھم جیسے کثیرالثقافتی شہر میں ایک مسلم لارڈ مئیر کا انتخاب بین المذاہب ہم آہنگی، جمہوری اقدار اور کمیونٹی شمولیت کی ایک مثبت مثال کے طور پر دیکھا جا رہا ہے۔
میڈیا کوریج کے دوران لی گئیں یادگار تصاویر اس تاریخی دن کی خوبصورت جھلکیاں پیش کرتی ہیں، جن میں سیاسی وقار، عوامی جوش و خروش اور کمیونٹی یکجہتی نمایاں طور پر محسوس کی جا سکتی ہے۔
